YNK: “Li Kerkûkê vekirina baregahên partiyên Kurdistanî qedexe ye”

PeyamaKurd - Polîtbûroya Yekîtiya Nîştîmanî ya Kurdistanê (YNK) ji Serokomar, Serokwezîr û Serokê Parlamentoya Iraqê re nameyek şand û diyar kir, ku 6 meh piştî bûyeren 16ê Cotmehê hê jî li Kerkûk û navçeyên din ên nakok desthilata eskerî û ewlekarî rê nade baregahên partiyên Kurdistanî werin vekirin.

Polîtbûroya YNKê bi navê “Vekirina baregahên hêzên Kurdistanî hê jî qedexe ye” ji Serokomarê Iraqê Fûad Masûm, Serokwezîrê Iraqê Heyder Îbadî û Serokê Parlamentoya Iraqê Selîm Cibûrî re nameyek şand û got: “Mixabin, piştî bûyerên 16ê Cotmehê, ku zêdetirî 6 meh bi ser ve derbas bûn, li Kerkûk, Xaneqîn, Şingal, Celawla, Sedîye, Qeretepe û navçeyên din hê jî desthilata eskerî û ewlekarî rê nadin baregahên partiyên Kurdistanî vebin, ku ev partiyên resmî û yasayî ne.”

Di nameyê de tê gotin, ku di dema propagandaya hilbijartinê de li ser hêzên Kurdistanî fişareke nedestûrî heye. Herwiha li gelek cihan jî malên berpirs û kadroyên aliyên Kurdistanî hatine dagirkirin.

YNK ji ber vê rewşê hişyarî dide û dibêje: “Berdewamkirina vê siyaseta li dijî maf û azdiyên aliyên siyasî, di raya giştî ya wan navçeyan de gumeneke bi ziyanbexş çêkiriye û eger wiha berdewam bibe ne dûr e bûyerên bi ziyan biqewimin.”  

 Di dawiya nameyê de Polîtbûrpya YNKê ji aliyên peywendîdar dixwaze ji bo çareserkirina rewşê kar bikin.